DILI—Reprezentante Permanente Timor-Leste, Embaixadora, Maria Helena Lopes de Jesus Pires, iha loron 09 fulan-Janeiru tinan ne’e, hala’o sorumutu ho Vise-Sekretáriu Jerál Nasoins Unidas, Amina Mohammed, iha Kuartel Jerál Nasoins Unidas, hodi ko’alia kona-ba oinsa hametin kooperasaun entre TL ho ONU to’o ohin loron.
Komunikadu Imprensa ne’ebé Timor Post asesu liuhosi Ministériu Negósiu Estranjeiru no Kooperasaun (MNEK), informa iha sorumutu ne'e, parte rua ko’alia kona-ba asuntu importante balun, hanesan kontribuisaun ba fundu koordenadór Rezidente (Resident Coordinator), akreditasaun no importansia hosi misaun refere, aprezentasaun relatóriu Revizaun Nasionál Voluntáriu (Voluntary National Review) kona-ba implementasaun Ajenda 2030, hosi parte Timor-Leste, ne'ebe tuir planu sei hala’o iha fulan-Jullu 2019 iha Nova Iorke, no planu komemorasauntinan 20 Konsulta Popular, ne'ebe sei hala’o iha fulan Agostu, iha Dili, Timor-Leste.
Reprezentante Permanente ne’ebé koñesida ho naran Milena Pires ne’e hato'o tan katak kooperasaun entre Timor Leste ho Nasoins Unidas to'o ohin loron lao di’ak tebes. Durante ne'e, Timor Leste sai mós nu’udar istória susesu ida ba Nasoins Unidas. Tanba ne'e, Timor-Leste kontinua fó importansia ba kooperasaun di’ak ne'ebe iha no pronto nafatin atu hala’o nian papel ativu iha area multilateral hodi kontribui ba paz no seguransa globál.
Eis Ministru Negósiu Estranjeiru, Zacharias Albano da Costa, nia kaben ne’e hato’o mós ba Vise- Sekjer katak TimorLeste nian kompromisu atu kontribui ba fundu Koordenadór Rezidente iha prosesu hela no hein katak iha tempu badak TimorLeste sei konkretiza kompromisu ne'ebe iha.
Louva Rezidente Dili
Pires mós louva kolaborasaun Koordenadór Rezidente iha Dili no afirma Timor-Leste sei kontinua servisu ho Koordenadór Rezidente atu bele hamutuk asegura prosesu implementasaun objetivu Dezenvolvimentu Sustentável 2030. Tuir planu, Timor-Leste sei halo mós aprezentasaun kona-ba Revizaun Nasionál Voluntáriu, ne'ebe sei hala’o iha fulan Julhu tinan ne'e iha Nova Iorke, no prosesu ne'e rasik oras ne'e lidera hosi Gabinete Primeiru- Ministru RDTL. Iha biban ne'e, Maria Helena Pires informa mós katak TimorLeste sei komemora tinan 20 Konsulta Popular, ne'ebe tuir planu sei hala’o iha fulan Agosto 2019, iha Dili, Timor-Leste. Ho konsiderasaun ba papel Nasoins Unidas nian ne'ebe importante tebes iha prosesu ne'e, Timor-Leste hein katak Sekretariu-Jerál Nasoins Unidas bele atende eventu historiku ne'e. Vise Sekretariu-Jerál Nasoins Unidas, Amina Mohammed, apresia tebes ho informasaun hirak ne'ebe hato'o no expressa mós gratidaun ba Timor-Leste nian papel no kontribuisaun hahu hosi Painel Altu Nivel pessoa eminente sira ba Ajenda Dezenvolvimentu Pos-2015 (High Level Panel of eminent persons on the Post - 2015 Development Ajenda).
Vise-sekretariu Jerál akresenta liután katak Timor-Leste nian papel iha prosesu ne'e importante tebes tanba fo apoiu makas ba formatu hosi objetivu globál hirak ne'ebe ohin loron komunidade internasionál tenta atu implementa tuir Ajenda 2030. Alende ne'e visesekretáriu Jerál mós hato'o nian agradesimentu ba Timor-Leste nian kontribuisaun ba fundu Koordenadór Rezidente.
Asaun ida ne'e fo sinál di’ak tebes ba estadu membru sira seluk no sai mós nu’udar referensia di’ak ida atu habelar liután baze hosi fundu ne'e, hodi bele hetan kontribuisaun mós husik estadu membru sira seluk., visesekretáriu Jerál elojia Gabinete Primeiru-Ministru (GPM) nian lideransa no esforsu hodi kondus prosesu Revizaun Nasionál Voluntáriu.
Nia haktuir liután katak importante tebes atu uza ida ne'e atu bele hare'e nasaun ida nian esforsu iha prosesu implementasaun objetivu hirak globál nian, ventu sira hanesan Revizaun Nasionál Voluntáriu iha Foru Politiku Alto Nivel (HLPF) no eventus sira seluk Assembleia Jerál nian sei sai mós nu’udar referensia hodi hare'e, ba oin, oinsa nasaun no rejiaun sira transforma a'an tuir implementasaun Ajenda 2030.
Vise-sekretáriu Jerál afirma ninia gabinete oras ne'e konsentra hela mós ba mekanizmu Kuadru Assisténsia ba Dezenvolvimentu Nasoins Unidas (UNDAF) ato bele hatan ba pais ida-idak nian nesesidade.
Alende ko’alia kona-ba asuntu hirak ne'e, Reprezentante Permanente Timor-Leste no Visesekretáriu Jerál Nasoins Unidas troka mós hanoin kona-ba partisipasaun feto iha sistema Nasoins Unidas, rejiaun no iha rai ida-idak. Parte rua konkorda katak esforsu tenke kontinua halo no presiza halo konstantamente, nune'e bele realiza balansu jeneru, ne'ebe Nasoins Unidas apela ba mundu atu halo. (yto)
Article credit: Timor Post 16 January 2019